كراسات اللقا

هانى آدم

إجمع دفاتر وحدتك مع كراسات اللقا
و اطرح جراحك بقى
من جملة الأفىاح
شوف كام حبيب بعتهم
و كام حبيب باعك
و كام صديق غرقك
و كام صديق خانك
و كام صديق كملوا معاك لدلوقتى
قبل اما تندهلهم
بيحضروا وقتى
أول ما تحتاجلهم
من غير ما تندهلهم
متلومش غير نفسك
دى كلها إختبارات
خدتها بنفسك
فرص و ضيعتها
و كلمه ما قولتها
و طريق قطع نفسك
و تمن شهور و سنين
ضيعتها فى قرب ناس
حرام تقربلهم
و بعدت عن تانيين
كانوا مشتاقين طلتك
كرهت ليه قربههم
تنهيده مكتومه
و خطيئه معصومه
و حلم نصه حرام
كلام مالوش معنى
جاب م القريب طعنه
طرحت جراح و آلام
الحسبه فيها أخطاء
شاء فيها من لم يشاء
عمره يضيع ببلاش
و ساعات فى غفلة وجع
ترجع مواسم الجدع
يحس بالإنتعاش
تهرب آهات دواوينه
فى ضحكه من بنت روحه
و واد شايل تفاصيله
معرفش يسندلهم
على الزمن ضهرهم
و يغنوا على مواويله
لام نفسه تانى الجدع
على كل لحظة هوان
آن الأوان تبقى باقى
أناشيده سطر فى أدان
يمكن فى الوقت الضايع
أحلامه تلحق جون
الشاعر من يومه ضايع
معجونه حكاياته جنون