الشاعر سامح هريدي يكتب:

مطلوب علي وجه السرعة

ناس يعني تراعي العِشرة

وتصون العيش والملح ..

ناس تفضل جنبك لما

يشتد عليك الجرح..

ناس تفرح من جواها

لو زارك مره الفرح ..

ناس تفهم كل مشاكلك

من نظرة عين وتحس ..

ناس تحفظ دايما غيبتك

ولا مره يجيبوا ف سيرتك

غير بالحب و بالخير ..

ناس يعني تقدَّر طيبتك

ويكون جواها ضمير

صاحي ومش ميت يعني

واضح عمره ما بيغش..

ناس زي القهوة مزاج

مالهاش أكتر من وِش..

ناس تفرح لما تشوفهم

وكمان ترتاح وياهم..

ناس تسكن جوه قلوبهم

وتكون ف الجرح دواهم ..

مطلوب علي وجه السرعة

ناس مهما هايحصل بنا

مش ممكن يعني تبيعني..

ناس صافية وناس متصالحة

مع روحها تكون متسامحة

لو تبقي الدنيا هموم

ف وجودهم يصبح فرحة ..

أفهم طلباتي يا قلبي

وبلاش تتعبني معاك

مش كل يومين تشبكني

مع ناس بقى مش فاهماك

ناس تقبل كل عيوبك

وتكون برضك حبَّك..

م الاخر تصبح توبك

وتكون دايما ستراك ..

#شاعر_الغلابة