أشكال اختام اللحوم بالمجازر الحكومية 

الدكتور أحمد حمدي الشبح

مدير المجزر الآلي بسوهاج

الناس عارفه ان اللحمه طالما عليها علامه حمرا تبقي كويسه وخارجه من المجزر

بس ماتعرفش إن العلامات دي أشكالها مختلفة وكل شكل بيحدد نوع وعمر ودرجة جودة اللحمة كمان

السؤال اللي دايما بيتكرر مع حضراتكم هو

“عايزين نعرف شكل أختام اللحوم؟

والنهاردة هنتعرف على كل شكل لختم المجزر وإيه دلالته على اللحمة

وإزاي أقدر أحدد هل أشتريها ولا لأ

أختام المجازر الحكومية

الختم يحتوي على بيانات منها

تاريخ الذبح ويقصد بيها يوم الذبح بمعنى السبت هتلاقي رقم (١) والأحد (٢) لحد الجمعة رقم (٧) وده هيخليك لما تشتري لحمة يوم الخميس مثلًا يبقى المفروض تلاقي على الختم رقم (٦) لكن غير كده يبقى مش دبح اليوم

العلامة السرية

والرقم الكودي للمجزر

ونوع الذبيحة ودي هشرحها بالتفصيل

الاختام تحمل اول حرفين من نوع الدبيحة

بق »» تعني بقري

جا»» تعني جاموسي

جم»» تعني جملي

ضا** تعني ضاني

ما ** تعني ماعز وهكذا

شكل الاختام

1_ الختم الدائري يستخدم للحوم صغيرة السن(تحت ٥ سنين)

ودي الأعلى جودة

2_ الختم المربع يستخدم للحوم كبيرة السن (فوق ٥ سنين )

ودي أقل جودة من الصغيرة في السن

3_ الماعز يختم دائما بالختم المربع

4_ لحوم العوارض أختامها كما هي ثمانية الأضلاع حمراء والعوارض هي اي حيوان حدث له حادث طارئ او شارف على الموت دون ان يكون

السبب مرضي

ودي بتتباع على انها لحوم بسعر أقل

5-الختم البنفسجي للحوم المستوردة (السوداني مثلاً)

ملحوظة :

خلي بالك البتلو مالهوش ختم لانه أصلًا ممنوع دبحه داخل المجازر

وده يعني إنك لو شفت بتلو متعلق عند جزار وعليه علامات حمرا يبقى لازم تعرف إنه دابح بره المجزر ولازم تشك كمان في اللحوم التانية اللي عارضها سواء كندوز أو ضاني

هتسألني ليه طيب الجزار أصلًا بيدبح بره المجزر

هقولك علشان يهرب من الرقابة الصحية اللي بيقوم بيها طبيب المجزر ورقابة الدولة من ضرايب أو رسوم وغيره

ولو هتقولي إن اللحوم اللي بتندبح في الشارع بتكون كويسة وشكلها طبيعي وبتشتري منها عادي هقولك مش كل امراض اللحوم بتكون باينة على شكل اللحمة الخارجي

فيه أمراض ممكن تنتقل للانسان ومفيش أي دليل ليها على شكل اللحمة زي السل مثلًا

الخلاصة

سعر كيلو اللحمة بقى ميزانية لوحده وعلشان كده خليك في المضمون علشان تحافظ على صحتك وفلوسك